Thanks to the Inquirer for photo.
Ayun sa balita, ang kanyang kasama sa buhay ngayon na si Grace Ibuna lang ang kanyang kasama sa ospital sa London nang binawian siya ng buhay.
Nang pumutok ang isyu tungkol sa pagbenta ni Mike Arroyo sa Philippine National Police ng gamit na helicopter sa presyo ng bago, ininterbyu si Iggy sa TV at doon nalaman na nasa London pala siya at nagpapagamot dahil sa sakit sa atay (cirrhosis of the liver). Payat nga siya.
Kahit may isyu tayo sa ibang tao, lalo na sa opisyal ng pamahalaan, gusto natin panagutin sila ngaunit ayaw natin na may mangyaring masama sa kanila.
Maraming leksyun ang makukuha natin sa nangyayari ngayon sa mga Arroyo na nasa kapangyarihan ng siyam na taon. Ngayon, bumaligtad ang kanilang mundo. Naka-hospital arrest si Gloria Arroyo at maraming mabibigat na kaso ang nakasampa sa kanya.
Wala sa ospital ang kanyang asawang si Mike ngunit delikado rin ang kalusugan dahil nakaranas na rin siya ng atake sa puso. May mga kaso na ring nakasampa kay Mike.
Naging kontrobersyal si Iggy dahil dalawang beses na sinalo niya ang kanyang kapatid na si Mike sa kontrobersiya. Una ay ang pag-aari ng bank accounts na sa pangalan na “Jose Pidal” pangalawa, ang tungkol sa mga helicopter na ibinenta sa PNP. Sabi niya bilang president ng kumpanya ng pamilya, siya ang nakaka-alam tungkol sa helicopter, hindi ang kanyang kapatid na si Mike.
Ang kontrobersya naman kay Iggy ay tungkol sa kanyang personal na buhay. Ayun sa balita ngayon, sinabi na Lorna Kapunan, abogado ng kanyang asawa na si Alicia Aroryo na baka samoahan ng kaso si Grace Ibuna dahil sa kanyang desisyun na tanggalin ang life support system na siyang bumuhay kay Iggy mula Miyerkules nang nagkaroon siya ng heart attack.
Sabi ni Kapunan, wala raw karapatan si Grace magdesisyun dahil hindi siya ang legal na asawa. Inamin din ni Alicia na hiwalay sila ni Iggy mula pa noong 2005.
Ang unang asawa ni Iggy ay si Marilen Jacinto, kapatid ng negosyante na musikero na si RJ Jacinto.
Noong 2006, nagpalitan ng akusayon sina Alicia, na isang stock broker, at si Iggy dahil sa pera sa kanilang joint bank account at maraming ari-arian. Ang usap-usapan sa business community ay nilimas daw ni Alicia ang dollar account nilang mag-asawa at nakakalula ang bilang. Ang tanong nga ng marami, ‘Paano sila ng nagkaroon ng ganun kadaming pera?’
Hindi lang daw si Iggy ang galit sa ginawa ni Alicia. Pati rin daw si Mike. Ang kumento nga ng marami, ‘Hindi kaya kay Mike pera yun?’
Sabi ng mga nakakakilala sa mga Arroyo, mabait daw si Iggy. Siguro nga. Kaya palagi niya sinasalba ang kanyang kapatid na si Mike.
Depende sa pagkakilalala natin kay Iggy Arroyo, iba-iba ang leksyun na makukuha sa kanyang makulay na buhay.
Related documents:
http://www.ellentordesillas.com/2007/06/27/wife-sues-iggy-arroyo-over-depletion-of-p127m-in-assets/
http://www.ellentordesillas.com/2007/03/24/shame-and-scandal-in-the-arroyo-family/
http://www.ellentordesillas.com/2007/03/24/shame-and-scandal-in-arroyo-family-2/
